ரஜினியின் கோச்சடையான் டிரைலர் ஏற்கனவே தமிழில் வெளியாகி உள்ள நிலையில், இந்தியில் அப்படத்தின் டிரைலரை, அமிதாப் பச்சன் வெளியிட்டார். முன்னதாக அமிதாப்பின் காலில் விழுந்து ரஜினி ஆசி பெற்றார்.
ரஜினியின் இளையமகள் செளந்தர்யா அஸ்வின் ரஜினிகாந்த், தனது அப்பாவை கொண்டு இயக்குநராக களமிறங்கியுள்ள படம் கோச்சடையான். இந்தியாவில் முதன்முறையாக அவதார், டின் டின் படங்களில் பயன்படுத்தப்பட்ட மோசன் கேப்ட்சரிங் தொழில்நுட்பத்தில் 3டி அனிமேஷன் படமாக இப்படம் தயாராகியுள்ளது.
சுமார் 125 கோடி செலவில் தயாரிக்கப்பட்ட இந்த படத்தில் ரஜினி இரு வேடங்களில் நடித்துள்ளார். அவருடன் பாலிவுட் நடிகை தீபிகா படுகோனே நடித்துள்ளார். கூடவே சரத்குமார், ஆதி, ஷோபனா, ருக்மணி, நாசர், இந்தி நடிகர் ஜாக்கி ஷெரப் என பெரும் நட்சத்திர பட்டாளமே நடித்துள்ளனர். ஏர்.ஆர்.ரஹ்மான் இசையமைத்துள்ளார்.
சமீபத்தில் இப்படத்தின் ஆடியோ மற்றும் டிரைலர் வெளியீட்டு விழா சென்னையில் நடந்தது. இந்தி நடிகர் ஷாரூக்கான் வந்து ஆடியோவை வெளியிட்டு சென்றார். கோச்சடையான் பாடல்கள் ரசிகர்கள் மத்தியில் பலத்த வரவேற்பு பெற்றது. டிரெய்லரும் வெளியாகி லட்சக் கணக்கானோர் இணைய தளங்களில் பார்த்துள்ளனர்.
இந்நிலையில் இப்படத்தின் இந்த டிரைலர் வெளியீட்டு விழா, மும்பையில் உள்ள சினிமேக்ஸ் வளாகத்தில் நடந்தது. இந்தி சூப்பர் ஸ்டார் அமிதாப் பச்சன் கலந்து கொண்டு இந்தி கோச்சடையான் டிரைலரை வெளியிட்டு ரஜினியை புகழ்ந்து பேசினார். முன்னதாக விழாவின் போது அமிதாப் காலில், ரஜினிகாந்த் விழுந்து ஆசி பெற்றார்.
விழாவில் நடிகர்கள் அமிதாப் பச்சன், ரஜினிகாந்த், அனுபம் கெர், நடிகை ஐஷ்வர்யா ராய் பச்சன், நடிகை கஜோல், லதா ரஜினிகாந்த், இயக்குநர் செளந்தர்யா மற்றும் பாலிவுட் பிரபலங்கள் பலர் பங்கேற்றனர்.
0 comments:
Post a Comment